–कृष्ण दवाडी
हिमाली आवाज । कास्कीको माछापुच्छ«े गाउँपालिकाका कृषक व्यावसायिक पशुपालनमा आकर्षित बनेका छन् ।
उत्पादित दूध बिक्रीका लागि बजारको राम्रो प्रवन्ध भएपछि विगतमा निर्वाहमूखी पशुपालन गर्दै आएका कृषक अहिले व्यावसायिक बन्दै आय आर्जनमा लागेका हुन् ।
सरकारले दूध उत्पादनका आधारमा अनुदान दिन शुरु गरेपछि साना तथा व्यवसाय उन्मुख कृषकले सहकारी संस्थाबाट दूध बिक्री गर्ने गरेका छन् । उत्पादनका आधारमा दिइने अनुदानले साना कृषक लाभान्वित छन् ।ठूला कृषकले भने आँफै बजारमा लगेर बिक्री गर्ने गर्दछन् । सहकारीले कृषकले उत्पादन गरेको दूध सङ्कलन गरी बजारमा पु¥याउने गरेका छन् ।
गाउँपालिका पशु सेवा शाखाका अनुसार गत आर्थिक वर्षमा विभिन्न पाँच वटा सहकारी संस्थाबाट १८ लाख ३६ हजार ६३ लिटर दूध बिक्री भएको छ । कृषकले उत्पादन गरेको दूध सहकारी संस्थाका माध्यमबाट बजारमा पुग्ने गरेको शाखा प्रमुख रामचन्द्र पौडेलले बताउनुभयो ।
गाउँपालिकाका तीन वडामा रहेका पाँच दूग्ध सहकारीले खरीद गरी बजारको सुनिश्चितता गर्दै आएका छन् ।
गत वर्ष भेँडाबारी दुग्ध उत्पादक सहकारी संस्थाबाट दुई लाख ११ हजार ८११ लिटर, हिमशिखर दूध उत्पादक सहकारी संस्थाबाट दुई लाख १६ हजार ५३९, घाचोक दुग्ध उत्पादक सहकारीबाट चार लाख २४ हजार ३१७,पिपलबोट दुग्ध उत्पादक सहकारी संस्थाबाट दुई लाख ३९ हजार २९० र प्रतिभा सामाजिक उद्यमी महिला सहकारीबाट सात लाख ४४ हजार १०६ लिटर दूध बिक्री भएको शाखा प्रमुख पौडेलले जानकारी दिनुभयो ।
गाउँपालिकाबाट दैनिक १० हजार ६०० लिटर हाराहारीमा दूध बिक्रीका लागि बजारमा जाने गरेको छ । गण्डकी प्रदेश सरकारले सहकारीबाट दूध बिक्रीको आधारमा कृषकलाई प्रति लिटर दुई रुपैयाँ पचास पैसा अनुदान दिँदै आएको छ ।यसैगरी गाउँपालिकाले पनि यसअघि प्रतिलिटर २५ पैसा अनुदान दिएकामा यस वर्षदेखी ५० पैसा अनुदान दिने भएको छ । गाउँपालिकाले गत वर्ष दुग्ध उत्पादक कृषकलाई उत्पादनका आधारमा रु पाँच लाख वितरण गरेको थियो । सहकारीबाट कृषकले गाईको दूधको मुल्य प्रतिलिटर रु ६० का दरले प्राप्त गर्ने गरेका छन् ।
सहकारी संस्था बाहेक पनि कृषकले आफैँ बजार खोजेर दूध बिक्री गर्ने गरेको बताइन्छ । अधिकाँस ठूला कृषकहरुले आफ्नै सवारी साधनबाट पोखरा लगायतका क्षेत्रका डेरी तथा सहकारीहरुमा दूध बिक्री गर्ने गरेका छन् । गाउँपालिकाका सबै वडाबाट गरी सिधै वर्षमा २० लाख आठ हजार ५०० लिटर दूध बिक्री हुने गरेको बताइन्छ ।
“गाउँपालिका दूध उत्पादनमा जिल्लामै पहिलो स्थानमा छ ।”शाखा प्रमुख पौडेलले भन्नुभयो,“स्थानीय सरकार र प्रदेश सरकारले उत्पादनका आधारमा दिने अनुदानले समेत वास्तविक कृषकले लाभ लिएका छन् । पशुपालन व्यवसाय राम्रोसँग फस्टाउँदै गएको छ ।”
गाउँपालिकामा हालसम्म गाई÷भैँसी फार्म २७८,बाख्रा ९८ र कुखुराका ८९ फार्म दर्ता भएका छन् । गाउँपालिकाको पशु तथ्याङ्कमा गाई चार हजार ३६५, भैँसी छ हजार ६६६, भेडा दुई हजार २२४,बाख्रा नौ हजार १५, कुकुर ९९९ र बँगुर ३९७ रहेको पशु शाखाले जनाएको छ ।
गाउँपालिका उपाध्यक्ष कृष्णकुमारी दवाडीले गाउँपालिका कृषिमा अग्रणी रहेकाले पशुपालन, दुग्ध व्यवसाय, कुखुरापालन, मत्स्यपालन लगायतका कृषि व्यवसाय व्यवसायिक रुपमा अघि बढाउन गाउँपालिकाले कार्यक्रम सञ्चालन गरिरहेको बताउनुभयो ।
दुध उत्पादक कृषकहरूलाई सहकारी मार्फत बिक्रीका आधारमा अनुदान, अनुदानमा पावर टेलर, च्याप कटर, बोका र निःशुल्क घाँसका बिउ र सिड विन वितरण, वडा नं २ र ९ मा स्थानीय भैसी संरक्षण कार्यक्रम, एक वटा गाई÷भैसी पकेट क्षेत्र लगायतका कार्यक्रम गाउँपालिकाको प्राथमिकतामा रहेको उहाँले जानकारी दिनुभयो ।
“पशुपालनमा जिल्लामै अग्रणी स्थानमा रहेको यहाँका कृषकको मनोबल उच्च राख्दै कृषिलाई व्यवसायिकरण, आधुनिकीकरण, र यान्त्रिकीकरण गाउँपालिकाको प्राथमिकतामा छ ।” उपाध्यक्ष दवाडीले भन्नुभयो । गाउँपालिकाले चालू आर्थिक वर्षमा कृषि र पशुतर्फ रु एक करोड पाँच लाख ७३ हजार ३७३ बजेट विनियोजन गरेको छ ।
