हिमाली आवाज । पदयात्राका क्रममा कास्कीको अन्नपूर्ण गाउँपालिका–११ देउरालीस्थित चुमरुङमा हिमपहिरोमा परी बेपत्ता भएका २८ वर्षीय चिनियाँ नागरिक ई–चेङ युआनको १३ दिनपछि आज शव फेला परेको छ ।
सशस्त्र प्रहरी बल कालिका गण पोखराबाट विपद् उद्धारका सामग्रीहरु सहित विशेष विपद् उद्धार टोलीले आज विहान देउराली चुमरुङस्थित मोदी नदी किनारबाट २० मिटर उत्तर शव फेला पारेको कालिका गणका गणपति प्रहरी उपरीक्षक सूर्यप्रसाद तिमिल्सिनाले जानकारी दिनुभयो ।
विश्व प्रख्यात अन्नपूर्ण आधार शिविर(एविसी) को पदयात्रा सकेर घान्द्रुकतर्फ फर्कदै गर्दा गरेका पर्यटक बेपत्ता भएको सूचनापछि प्रहरी टोली खटिएको थियो ।
प्रहरी उपरीक्षक तिमिल्सिनाका अनुसार पर्यटकको शव घटनास्थलबाट बाहिर निकालिएको र पोखरा ल्याउने तयारी भइरहेको छ ।
गत चैत ११ गते दिउसो १२ः३० बजेको समयमा कास्कीको अन्नपूर्ण गाउँपालिका.–११ देउराली स्थित चुमरुङमा हिमपहिरो गएको थियो । बेसक्याम्पबाट फर्केका दुई भारतीय नागरिकले देउरालीमा गएको हिम पहिरोमा एक पर्यटक पुरिएको सूचना प्रहरीलाई दिएपछि खोजी सुरु गरिएको थियो ।
पर्यटक हराएपछि स्थानीय वासिन्दा र नेपाल प्रहरीको टोलीले खोजी गर्दा फेला नपारेपछि कालिका गणबाट सशस्त्र प्रहरी निरीक्षक विश्वराज त्रिपाठीको कमाण्डमा चैत १६ गतदेखी प्रहरी टोली खटिएको थियो ।
