कृष्ण दवाडी ⁄ हिमाली आवाज । कास्कीको माछापुच्छ्रे गाउँपालिका–३ घाचोकका पूर्व वडासदस्य रेशमकुमार नेपालीको उपचारका लागि रु २५ लाख ९० हजार एकासी सहयोग जुटेको छ ।
नेपाली रेक्टर क्यान्सरबाट पीडित भई एक महिनादेखी भारतको नयाँदिल्लीस्थित राजीव गान्धी क्यान्सर इन्स्च्यिुट एण्ड रिसर्च सेन्टरमा उपचार गराइरहनुभएको छ ।उहाँको उपचारका लागि आर्थिक अभाव भएपछि सामाजिक सञ्जालबाट उपचारमा सहयोगका लागि अपिल गरिएको थियो ।
सोही अनुसार स्वेदश तथा विदेशबाट गरी हालसम्म सहयोग प्राप्त भएको उपचार सहयोग संकलन समितका अध्यक्ष सूर्यप्रसाद लम्सालले जानकारी दिनुभयो । उहाँले सामाजिक सञ्जाल फेसबुकको आह्वानबाटनै धेरै सहयोेगी मनले खुलेर सहयोग गरेको बताउनुभयो ।
पूर्ववडाध्यक्ष समेत रहनुभएका लम्सालले भन्नुभयो,“ सहयोग संकलनका लागि कुनै घरदैलो गरेका छैनौँ, हामीले सामाजिक सञ्जालबाटनै आह्वान गरेर ठूलो रकम जुटाएका छौँ । यसबाट धेरै बिरामीको उपचारका लागि सहयोग मिलेको छ । सहयोग गर्नका लागि समितिलाई खोजी गर्दै आउनुभएको छ ,हामी आभारी छौँ ।”भारतमा उपचाररत बिरामीको स्वास्थ्यमा सुधार हुँदै गएको बताइन्छ । नेपालीलाई बिहीबार साँझ दोस्रो किमो दिइएको थियो ।
रेशमको उपचार पद्धती लामो र खर्चिलो भएकाले रु ७० लाख हाराहारीमा खर्च हुने समितिका सचिव पदम नेपालले बताउनुभयो ।उहाँले स्वदेश तथा विदेशमा रहनुभएका सबै मनकारीहरुलाई सक्दो सहयोग गर्न समेत आग्रह गर्नुभएको छ । संकलन भएको सहयोग रकम केही विरामीका परिवारलाई हस्तान्तरण गरिसकिएको र केही रकम समितिको खातामा रहेको सचिव नेपालले बताउनुभयो ।
नेपाली विसं २०७४ को स्थानीय तह निर्वाचनमा नेकपा(एमाले)बाट वडा सदस्यमा निर्वाचित हुनुभएको थियो । उहाँले विभिन्न संघ संस्थाको समेत नेतृत्व गर्नुभएको थियो ।
