हिमाली आवाज । सञ्चार तथा सूचना प्रविधिमन्त्री एवम् सरकारका प्रवक्ता पृथ्वीसुब्बा गुरूङले गण्डकी प्रदेश लोक साहित्य, संस्कृति र लोक नृत्यको उर्वर भूमि रहेको बताउनुभएको छ । उहाँले समाजको रुपान्तरणको लागि गीत सङ्गीत शक्तिशाली रहेको समेत उल्लेख गर्नुभयो ।
राष्ट्रिय लोक तथा दोहोरी गीत प्रतिष्ठान नेपालको आयोजनामा पोखरा सभागृहमा आज वरिष्ठ लोकगायक पुरूषोत्तम न्यौपानेको साङ्गितीक साँझको शुभारम्भ गर्दै उहाँले नेपालको लोक साहित्यका क्षेत्र गण्डकी प्रदेश र यहाँका कलाकारको योगदानलाई सदैव जीवित राख्नुपर्ने बताउनुभयो ।
“गण्डकी प्रदेशले नेपालको लोक साहित्य र संगीतका क्षेत्रमा गरेको योगदानको सन्देश सँधै दिनुपर्दछ । गण्डकी लोक साहित्य र नृत्यको उर्वर भूमि हो, यो अहिले पनि जीवित छ भन्ने कुराको सन्देश दिनुपर्नेछ । ” सञ्चारमन्त्री गुरुङले भन्नुभयो ।
गीत गाउने, नाच्ने तथा रमाउने जस्ता स्वतन्त्रताको लोकतन्त्र र गणतन्त्रका कारणबाट सम्भव भएको बताउँदै उहाँले सङ्घीय लोकतान्त्रिक शासन व्यवस्थामा मात्र यी लगायतका स्वतन्त्रताको उपभोग सम्भव छ भन्ने सन्देश दिनुपर्नेमा जोड दिनुभयो ।
उहाँले भन्नुभयो,“स्वतन्त्रता बिना नेपाली समाज समृद्ध बन्न सक्दैन । मानिस गीत सङगीतले खुशी हुन्छ । गीत सङ्गीतको अधिकार लोकतन्त्रको कारणले सम्भव भएको छ ।”
प्रतिष्ठान नेपालको आयोजनामा लोकदोहोरी गायक तथा सर्जक न्यौपानेको सांगीतिक साँझ गरिएको हो । सो साँझमा साँझमा न्यौपानेले १८ गीत प्रस्तुत गर्नुहुनेछ ।
पुरुषोत्तमका ‘सररर पानीघट्टामा’, ‘ऐना हेरेर’, ‘रुन्छनी मन किन रुदैन’ जस्ता धेरै गीत चर्चित छन् । विसं २०२९ मा स्याङजामा जन्मिनुभएका न्यौपाने नेपाली लोक दोहोरी क्षेत्रमा एउटा गर्विलो ईतिहास कोर्न सफल हुनुभएको छ ।
साढे तीन दशकदेखि निरन्तर नेपाली लोकसंगीतमा रहनुभएका न्यौपानेका हजार भन्दा बढी गीतहरु रेकर्डिङ छन् । पुरुषोत्तमले विसं २०४६ सालमा ‘बलाम देबीथान’ बोलको गीत गाएर सांगीतिक यात्रा प्रारम्भ गर्नुभएको थियो ।
