हिमाली आवाज । गण्डकी प्रदेश सरकारले प्रदेशका आठ जिल्लामा रिक्त रहेको जिल्ला खेलकुद विकास समितिमा पदाधिकारी नियुक्त गरेको छ । प्रदेश सरकार मन्त्रिपरिषद्को निर्णयानुसार नियुक्त पदाधिकारीले आज शपथ लिएका छन् ।
प्रदेश खेलकुद परिषद गण्डकीको सभाकक्षमा आयोजित कार्यक्रममा गण्डकी प्रदेश सरकारका सामजिक विकास युवा तथा खेलकुदमन्त्री विन्दु कुमार थापाको रोहबरमा परिषदका सदस्य सचिव श्रीधर शर्माले सपथ गराउनुभएको हो । विसं २०७७ मा पहिलोपटक चार वर्षे कार्यकालका लागि नियुक्त भएका पदाधिकारीको कार्यकाल गत फागुन ९ गते सकिएपछि खेलकुद समितिहरु पदाधिकारी विहीन थिए ।
प्रदेश सरकारले जिल्ला खेलकुद विकास समिति कास्कीको अध्यक्षमा मीलन गुरुङ, उपाध्यक्षमा तिलक अधिकारी क्षेत्री, सचिबमा अन्जु केसी र कोषाध्यक्षमा विग्नेश थापालाई नियुक्त गरेको छ ।
यसैगरी गोर्खाको अध्यक्षमा प्रेम बहादुर तामाङ, उपाध्यक्षमा मकेश बानियाँ, सचिवमा अमृता गुरूङ र कोषाध्यक्षमा होम बहादुर थापा मगर नियुक्त हुनुभयो ।
लमजुङको अध्यक्षमा सुमन श्रेष्ठ, उपाध्यक्ष अमृता पौडेल, सचिवमा मिन प्रसाद घले र कोषाध्यक्षमा रवि थापा तथा तनहुँको अध्यक्षमा अनिल पाण्डे, उपाध्यक्षमा इनकन पोख्रेल खनाल, सचिबमा विश्व कुमार बुढा र कोषाध्यक्षमा कविराज श्रेष्ठ मनोनित हुनुभएको छ ।
स्याङजाको अध्यक्षमा प्रकाश रेग्मी (पुनः दोहोरिएको), उपाध्यक्षमा विजय विक्रम खाँड, सचिवमा विद्यादेवी भट्टराई र कोषाध्यक्षमा धिरज खाँड, पर्वतको अध्यक्षमा जङ्ग बहादुर पुन मगर, उपाध्यक्षमा राजन गुरूङ, सचिवमा सपना पुर्जा पुन मगर र कोषाध्यक्षमा जगत प्रसाद लामिछाने, बागलुङको अध्यक्षमा (निर्णय हुन बाँकी), उपाध्यक्षमा कल्पना श्रेष्ठ र सचिवमा किशोर थापा, कोषाध्यक्ष (मनोनयन हुन बाँकी) हुनुहुन्छ ।
यसैगरी म्याग्दीको अध्यक्षमा सुमन श्रेष्ठ, उपाध्यक्षमा विष्णु कुमार रोक्का, सचिबमा कुमार किशान र कोषाध्यक्षमा नरेश पुन नियुक्त हुनुभएको छ । नवलपुरको निर्णय हुन बाँकी रहेको प्रदेश खेलकुद परिषद्ले जनाएको छ ।
गण्डकीका जिल्ला खेलकुद विकास समितिहरुमा सत्तारुढ नेपाली काँग्रेस र नेकपा(एमाले)ले भागबण्डाका आधारमा नेतृत्व लिएका छन् । प्रदेश सरकारको नेतृत्व गरिरहेको नेपाली काँग्रेसले छ जिल्लामा अध्यक्ष सहित कोषाध्यक्ष र एमालेले पाँच जिल्लामा अध्यक्ष र कोषाध्यक्ष पाउने गरी गरिएको सहमति अनुसार पदाधिकारीहरु नियुक्त गरिएको परिषद्का अध्यक्ष समेत रहनुभएका खेलकुदमन्त्री थापाले बताउनुभयो ।
शपथ समारोहमा मन्त्री थापाले नवनियुक्त पदाधिकारीहरुलाीई सफल कार्यकालको शुभकामना व्यक्त गर्दै आसन्न दशौं राष्ट्रिय खेलकुद प्रतियोगिताका लागि तयारी सुरु गर्न निर्देशन दिनुभयो । उहाँले पालिका हुँदै जिल्ला छनोटको कार्य जिल्ला खेलकुदको नेतृत्वमा रहेकोले उत्कृष्ट खेलाडी छनोट गर्न आग्रह गर्नुभयो ।
प्रदेश खेलकुद परिषदका उपाध्यक्ष धोज कुमार गुरूङले खेलकुद विकासको अभिभारा जिल्ला समितिमा निहित रहेको बताउँदै समितिका पदाधिकारीहरुले आफ्नो जिम्मेवार अनुरुप अघि बढन आग्रह गर्नुभयो ।परिषदका महाशाखा प्रमुख राम प्रसाद आचार्यले मनोनयन भएका पदाधिकारीहरुलाई अभिमुखिकरण गर्नुभयो ।
