हिमाली आवाज । कंक्रिटको जंगल बनेको शहरी क्षेत्रमा खेतीयोग्य खाली जमिन पाउन मुस्किल छ । गाउँमा घर वरिपरि करेसाबारी भएजस्तो शहरी क्षेत्रका घरसँग करेसाबारी हुनु दूर्लभ र अपवाद जस्तै छ ।
पोखरा महानगरपालिका १२ नम्बर वडा कार्यालयले कौसी खेतीका लागि तालिम कार्यक्रम सञ्चालन गरेको छ । वडा भित्रका महिलालाई आयआर्जनमा जोड्न तालीम दिइएको वडाध्यक्ष सन्तोष बास्तोलाले बताउनुभयो । उहाँका अनुसार यो तालिमको उद्देश्य महिलाहरुलाई आर्थिक रूपले सशक्त बनाउन र घरै बसेर आय आर्जन गर्ने अवसर प्रदान गर्नु हो ।
“मेहनेतसाथ उत्पादन गरेको तरकारी आफूले खाँदा आनन्द आउँछ । तरकारी किन्दा हुने खर्च पनि बचत हुन्छ । त्यसैले कौसी खेतीलाई प्राथमिकता दिएका छौँ ।” बास्तोलाले भन्नुभयो ।
तालिममा अर्गानिक तराकारी खेतिको आवश्यकता, माटोको तयारी, बाली छनौट, बेर्ना उत्पादन, बेर्ना सार्ने प्रक्रिया, मलखाद ब्यवस्थापन, सम्भावित रोग र निदानका उपाय र बाली भित्र्याउने प्रक्रिया सिकाइने पोखरा महानगरपालिका कृषि तथा आर्थिक विकास महाशाखा प्रमुख मनहर कडरियाले जानकारी दिनुभयो ।
शहरमा बढ्दै गएको कौसी खेतीको रुचीलाई देखेर होला पोखरा महानगरपालिका १२ नम्बर वडा कार्यालयले वीउ र मल निःशूल्क वितरण गरेको छ ।
कौसी खेतीलाई बढवा दिन पोखरा महानगरपालिकाले वडा–वडामा कृषि सञ्जाल गठन गरेको छ । तालिममा कौसी खेती कृषकले आ–आफ्ना अनुभव साटेका छन ।
