हिमाली आवाज । लायन्स अन्तर्राष्ट्रियस्तरमा एक सय ७ औं र नेपालमा ५३ औं वर्ष पूरा भएको अवसरम पोखरामा अन्तर्राष्ट्रियस्तरको पुरुष भलिबल प्रतियोगिताको तयारी गरिएको छ ।
सामाजिक सेवामा समर्पित लायन्स इन्टरनेशनल डिष्ट्रिक्ट ३२५ ‘एम’, नेपालले पोखरा रङ्गशालास्थित बहुउद्धेश्शीय कोर्टमा आगामी बैशाख १८ देखि २२ गतेसम्म पहिलोपटक अन्तर्राष्ट्रियस्तरको भलिबल गर्न लागेको पोखरामा पत्रकार सम्मेलन गरी जानकारी दिएको हो ।
लायन्स इन्टरनेशनल डिष्ट्रिक्ट ३२५ ‘एम’का डिष्ट्रिक्ट गर्भनर चण्डीप्रसाद अर्यालले प्रतियोगितामा विदेशीसहित कुल छ टिमको सहभागिता रहने जानकारी दिनुभयो ।
प्रतियोगितामा गण्डकी प्रदेश भलिबल संघ, त्रिभुवन आर्मी क्लब, नेपाल पुलिस क्लब, एपिएफ क्लब, र पाकिस्तान भलिबल क्लब इस्लामावादको सहभागिता रहने छ भने इरान र भारतको टिमसँग समन्वय भइरहेको अर्यालले जानकारी दिनुभयो ।
उहाँले भन्नुभयो,“पाकिस्तान र नेपालको गरी पाँच वटा टिमको सहभागिता निश्चित भएको छ । बाँकी एक टिमका लागि भारत र इरानी टोलीसँग कुराकानी भइरहेको छ । त्यो पनि छिट्टै फाइनल हुन्छ ।”प्रतियोगिताको विजेता टोलीले नगद रु चार लाख ४४ हजार चार सय ४४ शिल्ड, मेडल तथा ट्रफी प्राप्त गर्नेछ ।
यसैगरी उपविजेताले नगद रु दुई लाख ४४ हजार चार सय , शिल्ड, मेडल तथा ट्रफी हात पार्नेछ । तृतीय हुने टोलीले नगद रु एक लाख ४४ हजार चार सय ४४ शिल्ड, मेडल तथा ट्रफीद्वारा पाउनेछन् । विधागततर्फ समेत पुरस्कार राशीको पनि व्यवस्था गरिएको आयोजकले जनाएको छ ।
