हिमाली आवाज । नेपाली काँग्रेसका महामन्त्री गगनकुमार थापाले कास्कीको माछापुच्छ«े गाउँपालिकामा अवस्थित विश्व प्रख्यात मर्दी हिमाल पदयात्रा सुरु गर्नुभएको छ ।
महामन्त्री थापा परिवारका सदस्यको साथमा बुधबारदेखी मर्दी पदयात्रामा निस्कनुभएको हो । कास्कीको माछापुच्छ«े गाउँपालिकामा अवस्थित मर्दी छोटो समयमा पूरा गर्न सकिने पदयात्रा रुटमा पर्दछ ।
छोटो समयमा साहसिक पर्वतीय पदयात्राको आनन्द मिल्ने भएपछि मर्दी पदयात्रा पछिल्लो समय लोकप्रिय रहेको छ । मर्दी सहित आधा दर्जनभन्दा बढी हिमाल नियाल्ने अवसर पदयात्रामा मिल्ने भएकाले बाह्य तथा आन्तरिक पर्यटकको आकर्षण बढेको छ ।
महामन्त्री थापाले मर्दीको तीन रात र चार दिनको पदयात्रा सुरु गर्नुभएको हो । पर्यटकीय गाउँ धम्पुसबाट पदयात्रा सुरु गर्नुभएका थापा बुधबार राति मर्दीको हाइक्याम्पमा बास बस्नुभएको छ । उहाँ बिहीबार मर्दी आधार शिविरबाट फर्किएर लो क्याम्पमा बस्ने तथा शुक्रबार सिदिङमा व्यवसायी र जनतासँग छलफल गर्ने कार्यक्रम रहेको माछापुच्छ«े–९ का वडाध्यक्ष हरिबहादुर क्षेत्रीले जानकारी दिनुभयो ।
महामन्त्री थापाका साथमा परिवारका सदस्य बाहेक स्थानीय पर्यटन व्यवसायी तथा स्थानीय पार्टीका नेता कार्यकर्ता समेत रहेका छन् । पदयात्राका क्रममा उहाँले स्थानीय पर्यटन व्यवसायी लगायतसँग अन्तरक्रिया समेत गर्नुभएको थियो । मर्दी पदयात्रामा पर्यटकीय पूर्वाधार विकास तथा व्यवसायीका समस्या समाधानमा उहाँले साथ दिने प्रतिवद्धता जनाउनुभएको वडाध्यक्ष क्षेत्रीले जानकारी दिनुभयो ।
“मर्दी ट्रेकिङ रुटलाई कसरी व्यवस्थित गर्न सकिन्छ भनेर उहाँले चासो दिनुभयो । पूर्वाधार निर्माणका साथै स्थानीयले भोग्नु परेका समस्याका बारेमा समेत स्थानीयवासीसँग अन्तरक्रिया गर्नुभयो ।” वडाध्यक्ष क्षेत्रीले भन्नुभयो ।
स्थानीयले महामन्त्री थापासँग संरक्षण क्षेत्र व्यवस्थापन नियमावली २०५३ लाई अविलम्व संशोधन अघि बढाउन माग गरेका थिए । संरक्षण क्षेत्र व्यवस्थापन नियमावली संशोधन नहुँदा संरक्षण क्षेत्रभित्र सञ्चालनमा रहेका होटलहरुलाई कानुनी दायरामा आउन सकेका छैनन् ।
पोखराबाट २२ किमी दूरीमा रहेको माछापुच्छ्रेको घलेल हुँदै कालीमाटी तथा सिदिङसम्म जीपबाट पुगेर मर्दी पदयात्रा सुरु गर्न सकिन्छ । जंगलको बाटो हुँदै उकालो चढेर दुई हजार नौ सय ७० मिटर उचाइमा अवस्थित लो क्याम्प पुगिन्छ ।
माछापुच्छ्रेकै धम्पुस तथा अन्नपूर्ण गाउँपालिकाको काँढेबाट समेत पोथना, अष्ट्रेलियन क्याम्प, प्रितम देउराली, फरेस्ट क्याम्प हुँदै लो क्याम्पसम्म पर्यटक पुग्दछन् ।
लो क्याम्पबाट बादलडाँडा, हाइक्याम्प, ‘भ्यु पोइन्ट’ हुँदै चार हजार ५०० मिटर उचाइको मर्दी हिमाल आधार शिविर पुगिन्छ ।
