हिमाली आवाज । पोखरामा सञ्चालन भएको पिएम कप पुरुष एक दिवसीय गण्डकी प्रदेश छनोट क्रिकेट प्रतियोगितामा कास्की च्याम्पियन बनेको छ ।
प्रादेशिक क्रिकेट सङ्घको आयोजनामा यही फागुन ११ गतेदेखी पोखरा रङ्गशालामा सञ्चालन भएको प्रतियोगिताको आइतबार सम्पन्न फाइनल खेलमा अनिल गुरुङको अविजित ७९ रनको योगदानमा कास्कीले तनहँुलाई सात विकेटले पराजित गर्दै च्याम्पियन बनेको हो ।
कप्तान विपिन खत्री र सुवास भण्डारीको उत्कृष्ट बलिङ प्रेरित कास्कीले टस जितेर व्याटिङ रोजेको तनहुँलाई एक सय ८० रनमा रोक्यो । तनहुँले ४८ ओभरको चौथो बलमा सबै विकेट गुमाएर एक सय ८० रनको योगफल बनाएको थियो ।
खेलमा जितका लागि एक सय ८१ रनको लक्ष्य पछ्याएको कास्कीले अनिल गुरुङको अविजित ७९ रनको पारीमा लक्ष्य सहज रुपमा भेट्टायो । तनहुँले दिएको लक्ष्यलाई कास्कीले ४१ दशमलव तीन ओभरमा पूरा गर्योँ । पहिलो विकेटको लागि अनिल र अर्जुन कुमालले ६८ रनको साझेदारी निभाए ।
प्रतियोगितामा कास्कीका सुवास भण्डारी बेष्ट बलर, बेष्ट व्याटर तनहुँका समीर कँडेल, म्यान अफ दि सिरिज सुवास भण्डारी भए । विजेता तथा उपविजेता खेलाडीहरुलाई नेपाल क्रिकेट संघका केन्द्रीय सदस्य सुदीप शर्मा, प्रादेशिक क्रिकेट संघ गण्डकीका अध्यक्ष सन्जयकान्त सिग्देल, उपाध्यक्ष प्रकाश पौडेल, तनहुँ क्रिकेट संघका अध्यक्ष मदन तिमिल्सिना, संघका पूर्व अध्यक्ष देवेनसन प्रजु, लगायतले पुरस्कार प्रदान गर्नुभएको थियो ।
प्रतियोगितामा गण्डकी प्रदेशका कास्की, तनहुँ बाग्लुङ,नवलपुर, पर्वत र स्याङजा गरी छ जिल्लाले सहभागिता जनाएका थिए । सहभागी टोलीहरुलाई दुई समूहमा विभाजन गरिएको थियो ।
प्रतियोगिताबाट आसन्न पिएम कप राष्ट्रिय क्रिकेट प्रतियोगिताका लागि गण्डकीको टोली घोषणा गरिने प्रादेशिक क्रिकेट संघका अध्यक्ष सञ्जयकान्त सिग्देलले जानकारी दिनुभयो ।
