हिमाली आवाज । पोखरा इलेक्ट्रोनिक्स तथा मोवाइल व्यवसायी संघ कास्कीले बुधबार आफ्नो २५ औं स्थापना दिवस मनाएको छ । संघ कास्कीले बुधबार पोखरा–१३ स्थित भद्रकाली मन्दिर परिसर सरसफाई गरेर स्थापना दिवस मनाएको हो ।
सरसफाईमा संघका पदाधिकारी तथा कार्य समिति सदस्यहरुसहित संघमा आबद्ध इलेक्ट्रोनिक्स तथा मोवाइल व्यवसायीहरु सहभागी भएको अध्यक्ष चिन्तामणि खरेलले जानकारी दिनुभयो । संस्थागत सामाजिक उत्तरदायित्व अन्तर्गत स्थापना दिवसको अवसरमा सरसफाई कार्यक्रम गरिएको खरेलले बताउनुभयो ।
स्थापना दिवसका अवसरमा मंगलबार पोखराको नयाँबजारमा खुला रक्तदान कार्यक्रम गरिएको थियो ।
सो अवसरमा संघका कास्की अध्यक्ष खरेलको बुधबार नै जन्म दिन परेकाले उहाँलाई शुभकामनासमेत प्रदान गरिएको थियो । संघले व्यवसायीको हकहितका साथै विभिन्न सामाजिक कार्यहरु समेत गर्दै आएको छ ।
