हिमाली आवाज । राष्ट्रिय स्वतन्त्र पार्टीका सभापति रवि लामिछानेलाई पक्राउ गरेको विरोधमा पोखरामा भइरहेको आन्दोलनमा सञ्चारकर्मीहरु माथि भएको हातपात र सञ्चार सामग्री तोडफोडप्रति नेपाल पत्रकार महासंघ गण्डकी प्रदेश समितिले भत्र्सना गरेको छ ।
महासङ्घ प्रदेश समितिका महासचिव गोविन्द सुवेदीले आइतबार साँझ एक विज्ञप्ति जारी गरी समाचार संकलन गर्न गएका पत्रकारहरु माथि आन्दोलनरत पार्टीका कार्यकर्ताले गरेको हातपात र तोडफोडको घटनाप्रति गम्भिर ध्यानाकर्षण जनाउनुभएको छ ।
पोखराको शहीद चोकमा आज विहान सभापति लामिछाने पक्राउको विरोधमा राष्ट्रिय स्वतन्त्र पार्टीका कार्यकर्ताले निषेधाज्ञा तोड्दै प्रदर्शन गरेका थिए ।
सोही क्रममा प्रदर्शनकारीको तर्फबाट भएको ढुंगा प्रहारबाट एपीवान टेलिभिजनका गण्डकी व्युरो प्रमुख सागरराज तिमिल्सिना र सुनगाभान्यूज अनलाइनका समाचार प्रमुख सुशान्त गाहामगर घाइते हुनभएको छ ।
उहाँहरु दुबैको हातमा चोट लागेको छ भने गाहामगरले प्रयोग गर्ने क्यामेरा समेत फुटेको छ । यसैगरी प्राइम टेलिभिजनमा प्रत्यक्ष प्रसारणमा संलग्न पत्रकारद्वय निरज तामाङ, अनिता घिमिरे र क्यामेरा पर्सन अर्जुन भण्डारीमाथि हातपात गर्नुका साथै क्यामेरा तोडफोडको प्रयास भएको महासङ्घले जनाएको छ ।
यसैगरी प्रदर्शनकोे क्रममा समाचार संकलनमा गएका केही पत्रकारलाई ‘हाम्रो पार्टीविरुद्ध समाचार प्रसारण गर्नेे…’ लगायत अनर्गलरुपमा गाली गलौज गर्ने काम भएको महासङ्घले जनाएको छ ।
नागरिकलाई सुसूचित गराउन सञ्चारकर्ममा खटिरहेका पत्रकारमाथि एउटा स्थापित पार्टीका कार्यकर्ताबाट भएको हातपात निन्दनीय र प्रेस स्वतन्त्रतामाथिको प्रहार भएको महासङ्घको ठहर छ । यस घटनाले पत्रकारको र नागरिकको संविधानप्रदत्त अधिकारमा हस्तक्षेप भएको विज्ञप्तिमा उल्लेख छ ।
महासङ्घले घटनामा संलग्नमाथि तत्काल कानुनी कारबाहीको प्रक्रिया अगाडि बढाइ पत्रकारलाई निर्धक्क र निर्वाध रुपमा समाचार संकलन, प्रकाशन एवं प्रशारणको वातावरण निर्माण गर्न सम्बन्धित निकायको ध्यानाकर्षण समेत गराएको छ ।
