हिमाली आवाज । गण्डकी प्रदेश सरकारले दूग्ध उत्पादक कृषकहरुलाई गत आर्थिक वर्ष २०८०÷०८१ मा दूध उत्पादनका आधारमा रु तीन करोड नौ लाख छ हजार अनुदान दिएको छ ।
कृषि तथा भूमि व्यवस्था मन्त्रालय मातहतको पशुपन्क्षी तथा मत्स्य विकास निर्देशनालय पोखराले प्रदेशका ११ जिल्लाका ८५ स्थानीय तहमा उत्पादनमा आधारित प्रोत्साहन सहयोग कार्यक्रम सञ्चालन गरिएको जनाएको छ ।
सरकारले ६४ सहकारी संस्थाबाट १३ हजार नौ सय ६१ मेट्रिक टन दूध उत्पादन भएका आधारमा प्र्रतिलिटरमा दुई रुपैयाँ ५० पैसा अनुदान दिएको हो ।
सहकारी संस्थाबाट दूध बिक्री गर्ने कृषकले मात्र यस्तो सहयोग सरकारबाट पाउने पशुपन्क्षी तथा मत्स्य विकास निर्देशनालयका महानिर्देशक डा प्रेरणा सेढाई भट्टराईले बताउनुभयो ।
सरकारले दूध उत्पादन प्रोत्साहन सहयोग कार्यक्रममा अनुदान वृद्धि गर्ने योजना अनुसार गत वर्ष रु छ करोड ५५ लाख बजेट विनियोजन गरेको थियो ।
सरकारले अनुदान रकम वृद्धि गरेर प्रति लिटर रु पाँचका दरले कृषकलाई प्रदान गर्ने योजना बनाएपनि मन्त्रालयबाट कार्यविधि निर्माण तथा प्रदेश राजपत्रमा प्रकाशनमा ढिलाई हुँदा कृषकले बढेको रकम प्राप्त गर्न सकेनन् ।
“अनुदान रकम डबल वृद्धि गर्ने गरी बजेट समेत विनियोजन भएको थियो तर वृद्धिको कार्यविधि र राजपत्रमा प्रकाशनमा ढिलाई हुँदा गत वर्ष कार्यान्वयन हुन सकेन ।” महानिर्देशक भट्टराईले भन्नुभयो ।
सरकारले उत्पादनका आधार अनुदान दिएपछि कृषक समेत उत्साहित भएका छन् । यसबाट दूध उत्पादन वृद्धि गर्न सहयोग पुगेको छ । गण्डकीमा पशुजन्य पदार्ग दूध, मासु तथा माछा र अण्डाको उपलव्धता राष्ट्रिय उपलव्धता दर भन्दा बढी रहेको निर्देशनालयले जनाएको छ ।
दूधको राष्ट्रिय उपलव्धता प्रति व्यक्ति प्रति वर्ष ८८ लिटर रहेकामा गण्डकीको उपलव्धता एक सय आठ लिटर रहेको छ ।
यसैगरी मासुको राष्ट्रिय उपलव्धता १८ केजी रहेकामा गण्डकीको २३ केजी चार सय ग्राम तथा अण्डाको राष्ट्रिय उपलब्धता प्रति व्यक्ति ४६ गोटा रहेकामा गण्डकीमा ९९ गोटा रहेको महानिर्देशक भट्टराईले बताउनुभयो ।
उहाँले भन्नुभयो,“उत्पादनका आधारमा दिइने अनुदानले कृषकलाई उत्साहित बनाएको छ । जसले बढी उत्पादन गर्छ उसैले बढी सुविधा पाउने भएपछि पशुजन्य पदार्थ उत्पादनको उपलव्धता गण्डकी प्रदेशको राष्ट्रिय भन्दा बढी छ । ”
