कृष्ण दवाडी
हिमाली आवाज । गण्डकी प्रदेशमा आगामी असोज २८ देखी कात्तिक ३ गतेसम्म सञ्चालन हुने नवौं राष्ट्रिय खेलकुद प्रतियोगिताका लागि गण्डकी प्रदेशले छनोट प्रतियोगिता सञ्चालन गर्ने भएको छ ।
गण्डकीका ११ वटै जिल्लाबाट जिल्ला छनोटमा सफल भएका खेलाडीहरुका लागि पोखरा रङ्गशालामा भदौ १६ देखी १८ गतेसम्म प्रादेशिक छनोट प्रतियोगिता सञ्चालन गर्न लागिएको हो ।
परिषद्का सदस्य सचिव तेजबहादुर गुरुङले प्रदेशस्तरीय प्रतियोगिताका लागि ११ जिल्लाबाट महिला तथा पुरुष खेलाडी, प्रशिक्षक र व्यवस्थापक गरी तीन हजार २२३ जनाले सहभागिता जनाउने आज पोखरामा पत्रकार सम्मेलनमा जानकारी दिनुभयो ।
उहाँले भन्नुभयो,“प्रदेशका ११ वटै जिल्लामा जिल्ला छनोटका प्रतियोगिताहरु खेलाडीको उत्साहप्रद सहभागितामा सम्पन्न भएका छन् । प्रादेशिक छनोटपछि प्रदेशको टोली घोषणा गरेर विशेष प्रशिक्षण सहित बन्द प्रशिक्षण सञ्चालन गर्दछौ ।”
जिल्ला छनोटमा पाँच हजार ६७७ खेलाडीले सहभागिता जनाएकामा प्रादेशिक प्रतियोगितामा सो सङ्ख्यामा खेलाडी र व्यवस्थापक छनोट भएका हुन् । प्रत्येक खेलमा एक जना प्रशिक्षक र एक जना व्यवस्थापक राखिएको छ ।प्रादेशिक छनोट प्रतियोगितामा कास्कीले ३५ वटै खेलमा सहभागिता जनाउने भएको छ भने सवैभन्दा कम मनाङले पाँच खेलमा मात्र प्रतिस्पर्धा गर्नेछ ।
भदौ ८ देखी १४ गतेसम्म सञ्चालन भएको जिल्लास्तरीय छनोटबाट प्रादेशिक प्रतियोगितामा कास्कीबाट ६७३ खेलाडी छनोट भएका छन् । परिषद्का अनुसार मुस्ताङबाट १६६, म्याग्दी २८३, बागलुङ ३६१, पर्वत २२३, स्याङ्जा ३४७ र तनहुँबाट ३०३ खेलाडी प्रादेशिक छनोटमा परेका छन् ।
यसैगरी लमजुङबाट २१३, गोरखा २३०,मनाङ ४६ र नवलपुरबाट ३७८ खेलाडीले प्रदेशस्तरीय प्रतियोगिता खेल्नेछन् । गण्डकी प्रदेशले नवौँ राष्ट्रिय खेलकुदमा ३६ खेल र दुई प्रदर्शनी गरी ३८ वटै खेलमा सहभागिता जनाउने निश्चित भएको छ ।
प्रदेशस्तरीय खेलमा विजेता खेलाडीहरुलाई पदक, प्रमाणपत्र र ट्रफी पुरस्कार प्रदान गरिने आयोजकले जनाएको छ । यसैगरी समग्र प्रतियोगिताको खेलको आधारमा स्वर्ण, रजत र कास्यको परिणामलाई मुल्याङ्कन गरी जिल्लालाई प्रथम, द्धितीय र तृतीय घोषणा गरी च्याम्पियन ट्रफी प्रदान गरिने परिषद्ले जनाएको छ ।
राष्ट्रिय खेलकुदमा गण्डकीबाट ७०९ खेलाडी सहभागी हुनेछन् । प्रतियोगितामा ४०४ इभेन्टमा ४११ पुरुष र २९८ महिला खेलाडीहरुको सहभागिता रहने परिषद्का उपाध्यक्ष ध्वजकुमार गुरुङले बताउनुभयो ।
जिल्ला र प्रदेश छनोट तथा बन्द प्रशिक्षणका लागि कूल रु सात करोड ८५ लाख खर्च हुने अनुमान परिषद्को छ । सो रकम विशेष प्रशिक्षण, जिल्ला छनोट, प्रदेश छनोट, खेलाडी बन्द प्रशिक्षण, खेलकुद सामग्री खरीदमा खर्च हुने बताइन्छ ।
