हिमाली आवाज । सशस्त्र प्रहरीको नेपाल एपीएफ फुटबल क्लबले पोखरामा जारी राष्ट्रिय तथा अन्तर्राष्ट्रिय अन्तर क्लब आमन्त्रित ‘आहा ! रारा गोल्ड कप’ फुटबल प्रतियोगिताको अन्तिम चारमा स्थान बनाएको छ ।
पोखरा रङ्गशालास्थित फुटबल स्टेडियममा आज बैकल्पिक खेलाडीका रुपमा मैदान प्रवेश गर्नुभएका रवि थिङको दुई गोलको मद्धतमा एपीएफले पाहुना टोली भुटानिज युथ स्पोर्ट्स क्लब(विवाईएससी) मिनेसोटा अमेरिकालाई ३–१ गोल अन्तरले पराजित गर्दै प्रतियोगिताको सेमिफाइनलमा प्रवेश गर्न सफल भयो ।
आहा ! रारामा पहिलो पटक सहभागिता जनाएको मिनेसोटाले खेलमा अग्रता बनाएपनि जोगाउन नसक्दा प्रतियोगिताबाट बाहिरिएको छ ।
पहिलो हाफमा दुबै टोलीबाट गोल हुन नसकेको खेलमा दोस्रो हाफको दोस्रो मिनेटमा मेगल पलफक्सले ‘हेड’मार्फत गोल गरेपछि पाहुना टोली मिनेसोटाले खेलमा अग्रता बनायो ।
खेलमा एक गोलले पछि परेको अवस्थामा दोस्रो हाफको २५ औँ मिनेटमा एपीएफले आवास लामिछानेको गोल मार्फत खेल बराबरीमा ल्यायो ।
एपीएफका नविन लामालाई विपक्षी टोलीका गोल किपर दिनेश थापा मगरले ‘फाउल’ गरेपछि रेफ्री नबिन्द्र मर्हजनले एपीएफलाई पेनाल्टीको अवसर दिनुभएकामा लामिछानेले गोल गर्दै एपीएफलाई खेलमा फर्काउनुभयो ।
खेलको ८४ औँ मिनेटमा बैकल्पिक खेलाडी रबि थिङले गोल गर्दै एपीफएलाई अग्रता दिलाउनुभयो । थप गरिएको समयको चौथो मिनेटमा थिङले पुनः अर्को गोल गर्दै एपीफएको जित सुनिश्चित गर्नुभयो । खेलमा दुई गोल गर्नुभएका थिङ ‘म्यान अफ दि म्याच’ घोषित हुँदै रु आठ हजार नगद पुरस्कार पाउनुभयो ।
खेलपछिको पत्रकार सम्मेलनमा एपीएफका प्रशिक्षक कुमार थापाले रक्षापङ्क्तिको गल्तीका कारण पहिलो गोल खान पुगेपनि पछि सुधारिएको खेल प्रदर्शन गरेर जित हासिल भएको बताउनुभयो । आगामी खेलमा टोलीको प्रदर्शनमा थप सुधार गरिने उहाँले उल्लेख गर्नुभयो ।
विवाईएससीका प्रशिक्षक प्रलयराज भण्डारीले विपक्षीले पेनाल्टी पाउनुनै खेलको टर्निङ प्वाइन्ट बनेको बताउनुभयो । उहाँले प्राप्त अवसरमा खेलाडी गोल गर्न असमर्थ हुँदा पराजित हुनपुगेको टिप्पणी गर्नुभयो ।
प्रतियोगितामा आइतबार छ पटकको च्याम्पियन मनाङ मस्र्याङदी क्लब र पाँच पटकको उपाधि विजेता नेपाल पुलिस फुटबल क्लबबीच खेल हुने आयोजक सहारा क्लब पोखराले जनाएको छ ।मनाङले सिधै क्वारटफाइनलमा स्थान बनाएकामा पुलिसले शुक्रबार सडन डेथमा हिमालयन शेर्पा क्लबलाई पराजित गरी क्वाटरफाइनल प्रवेश गरेको हो ।
आगामी माघ १५ गतेसम्म सञ्चालन हुने प्रतियागितामा नेपालका ‘ए डिभिजन’का आठ क्लब सहित १० टोलीको सहभागिता छ ।
