हिमाली आवाज । सामुहिक लगानीको अनुकरणीय अभ्यास गर्दै आइरहेको भिजन लुम्बिनी पब्लीक कम्पनी लिमिटेडको नयाँ संचालक समिति गठन गरिएको छ ।
कम्पनीको बुटवलमा सम्पन्न साधारण सभाले संस्थापक अध्यक्ष जगतबहादुर पोखरेललाई नै पुनः अध्यक्षमा निर्विरोध निर्वाचित गरेको छ ।
कम्पनीको सञ्चालकहरुमा ई.लेखनाथ पाण्डे, कुल बहादुर केसी, बाबुराम श्रेष्ठ, दिपक शर्मा, राधेश्याम यादव, केशवराज पन्थी, गोपाल बस्याल, गिरी प्रसाद गैरे, यम प्रसाद गैरे र रिजन बज्राचार्य चयन हुनुभएको छ ।
छरिएर रहेको पुँजीलाई एकिकृत गरी सामुहिक लगानी र उच्चतम प्रतिफललाई आत्मसाथ गर्दै झण्डै एक हजार जनाको सहभागीतामा यो कम्पनी २०७३ सालमा स्थापना भएको हो ।
यसले शिक्षा, स्वास्थ्य, पर्यटन, कृषि, अर्थ, संचार, उर्जा गरि ९ वटा क्षेत्रमा परियोजना सञ्चालन गर्ने उद्धेश्य लिएको छ । यस अन्तर्गत २०७४ साल माघ १० गते भिजन लुम्बिनी टुर एण्ड ट्राभल्स, २०७५ आश्विन २६ गते भिजन लुम्बिनी उर्जा कम्पनी लिमिटेड र २०७६ भाद्र २ गते भिजन लुम्बिनी यातायात कम्पनी स्थापना गरी सञ्चालन भइरहेको छ ।
टुर
एण्ड ट्राभल्सले बुटवल तथा काठमाण्डौबाट सेवा प्रवाह गरिरहेको छ भने यातायात कंपनीले मोफसलमै पहिलो पटक बुटवलबाट एसी जडित सुविधा सम्पन्न १० ओटा बस संचालन गरिरहेको छ ।
त्यसैगरी उर्जा कम्पनीले गण्डकी प्रदेश अन्तर्गत कास्कीको माछापुच्छ्रे गाउँपालिकामा २५ मेगावाटको सेतिखोला जलबिद्यूत परियोजना निर्माण गरिरहेको छ ।
कृषिको विविधिकरण र विस्तारित लगानी मार्फत् यसलाई लगानीको उपयुक्त माध्यमका रुपमा स्थापित गराउने उद्धेश्यका साथ कम्पनीले रुपन्देहीमा ६ बिगाहा ५ कट्ठा जग्गा किनेर कृषि सम्वन्धी परियोजनाको तयारी गरिरहेको छ ।
बृहत्तर सपना बोकेको महत्वकाँक्षी कम्पनीले स्वास्थ्य बिज्ञान प्रतिष्ठान गठन गरी रुपन्देहीमा २०० शैयाको ट्रमा सेन्टर संचालन गर्नका लागि बुटवल उपमहानगरपालिकासंग समन्वय गरिरहेको छ भने लघु बीमा कार्यक्रम, केवलकार, संचार प्रतिष्ठान, प्राबिधिक विश्वविद्यालयलगायत संचालन गर्ने तयारी गरिरहेको अध्यक्ष पोखरेलले जानकारी दिनुभयो ।
भिजन लुम्बिनी स्थापना हुनु केही समय अगाडिदेखि पोखरेलकै नेतृत्वमा आरम्भ चौतारी लघुवित्त बैंक पनि संचालनमा रहेको छ । सो बैंक अहिले अरु ४ बैंकसँग मर्ज गर्ने प्रक्रियामा रहेको छ ।
