पोखरा,१८ भदौ। बाग्लुङको ढोरपाटन नगरपालिकामा गएरातिको बाढीबाट प्रभावितका लागि राहत सामग्री लिएर उडेको गृहमन्त्री रामबहादुर थापा सहितको टोली पोखराबाटै काठमाडौँ फिर्ता भएको छ ।प्रतिकूल मौसमका कारण हेलिकप्टर बाग्लुङ जान नसकेपछि पोखरा विमानस्थलमा अवतरण गरेको थियो ।
मौसममा सुधार नभएपछि गृहमन्त्री सहितको टोली पोखराबाटै काठमाडौँ फर्किएको कास्कीका प्रमुख जिल्ला अधिकारी ज्ञानप्रसाद ढकालले जानकारी दिए । विमानस्थलमा १२ः३० बजे अवतरण गरेको हेलिकप्टर एक घण्टा पोखरामा रहेको थियो ।
“मन्त्रीज्यू सहितको टोली मौसम खुल्ने प्रतिक्षामा पोखरा विमानस्थलमा रहेपनि मौसम सुधार नहुँदा काठमाडौँ फर्किनुभयो ।” प्रजिअ ढकालले भने ।
टोलीमा बाग्लुङबाट प्रतिनिधित्व गर्नुहुने प्रतिनिधिसभा सांसद देवेन्द्र पौडेल, राष्ट्रिय विपद् जोखिम न्यूनीकरण व्यवस्थापन प्राधिकरणका कार्यकारी निर्देशक अनिल पोखरेल लगायत रहेका थिए ।
ढोरपाटनको तीन वडाको तटिय बस्तीमा भूजी खोला पस्दा १४ जनाको मृत्यु तथा ३९ जना बेपत्ता भएका छन् ।
